洪禮賢講馬：主力難分清

猪拉多纳

　　近年大摩經常喺盃賽發功，畀人叫得做盃王，梗有兩道散手，當然，佢喺盃賽場合又唔係場場咁「正路」，主帥嗰匹有時冇影，贏嘅係同場廐侶（但唔代表賽前大摩主力一定係喺白德民嗰匹，可能我哋唔知啫），令人聯想到「摩」法幻影。

　　正如之前曾經寫過，邊個馬房都好，同場出多過1匹，熱門嗰隻、主帥騎嗰隻（或合作較多嘅騎練），唔係理所當然會係主力！

　　主帥可以揀錯馬，練者又可能因應馬主要求去安排配搭，所以，係咪主力旁落 ？ 好難有答案，基本上，唔會有邊位練者賽後會企出嚟，一五一十咁交代得清清楚楚，亦冇咁嘅需要啊。

　　講開盃賽場合（只計本地），上季大摩與苗禮德可以話各自各精彩，前者贏嘅次數最多，大大小小有13項，而後者勝出率及上名率最堅，總成績係6冠2亞3季（14負），勝出及上名率分別有23%和4成幾。所以，如果盃賽場合要吼大摩，有時苗廐馬都唔好當透明。

馬會賽馬節目主持　洪禮賢