哈化史特加做「大」騷

猪拉多纳

26/08/2011
文： 亨格比利

重返德甲嘅哈化柏林，踢完3輪聯賽都仲未開齋，今晚回師主場鬥史特加，目標當然係全取3分。不過咪話亨格比利潑冷水，呢班波主場出名靠唔住，橫掂史特加後防穿大窿，與其追盲門博哈化打破17場德甲主場跨季不勝，倒不如玩1.72倍入球大仲實際。（有線62及202周六凌晨2:30直播）




哈化呢班波好騎呢，作客表現遠比主場好，前季除咗首戰贏波，打後16場主場賽事竟然全部失分，估唔到呢個情況嚟到今季依然冇變，開鑼戰喺主場輸畀紐倫堡，有地利都冇甜頭，你話騎唔騎呢？


哈化射手拍心口留隊


睇番近績，哈化最近兩仗分別喺比賽末段逼和漢堡同漢諾威，證明呢支首都球隊後勁凌厲，對漢堡一戰仲3次攻門中楣中柱添，火力查實唔曳。哥倫比亞前鋒阿祖安拉莫斯前日否認離隊，仲寫包單表示起碼留隊至2015年，有佢衝鋒陷陣，要撕破史特加防線唔難。


史特加4守將唔出得


畢竟客軍最近好大鑊，計落就有尼達美亞、包亞同隊長迪比亞3位守將養緊傷，加上右閘保拿奴斯要坐波監，防線穿晒大窿，造訪急欲開齋嘅哈化都幾危。考慮到新加盟史特加嘅左翼伊巴謙查奧爾要倒戈證身價，哈化嗰邊亦有去季德乙下半場最佳球員胡比歷呢位鐵衞倦勤，大家防線都有隱憂，入波仲邊會少吖！