停擺後遺症 意軍捱細界

猪拉多纳

02/09/2011
文： ComboKing

足球係團體運動，強調整體利益凌駕個人利益，球員細細個已明白呢個道理，但現今足球太過商業化，球員利字當頭，動輒罷工罷操爭取好處，影響球隊利益。例如意甲球員罷工，影響意大利國家隊備戰歐國盃外圍賽，意軍未上力，今晚作客法羅群島，阿King揀入球細。（周六凌晨2時45分開賽）




C組嘅意大利絕大部分國腳喺本土搵食，意甲仲未開咧，球員未進入正式比賽狀態，就要為國出征，隨時唔可以發揮出正常水準。領隊柏蘭迪利亦承認受影響，事關佢只靠以往印象揀球員，未必選到最弗人腳入伍，所以唔好期望意軍重演首循環大炒對手嘅場面。事實上，意大利下周中仲要鬥小組第二位嘅斯洛文尼亞，相信柏蘭迪利唔會要求球員今場搏得太盡，只要攞三分已夠。




同組另外兩場，斯洛文尼亞要力保第二位，甚至搏超越意大利，今仗主場勢必全力搶分，炒得起五連敗嘅愛沙尼亞。北愛爾蘭靠防守搵食，喺今次外圍賽曾守和意大利○比○，今晚主場對塞爾維亞，要入球細。