魔童慶幸唔使同「Hea碧」過招

猪拉多纳

02/09/2011


唔知係咪頭髮多咗，朗尼呢排講句嘢都唔同啲！英格蘭作客保加利亞場歐國盃外圍賽今晚先踢，「魔童」賽前大口氣咁話「三獅兵團」贏面好大喎，點解？因為對家冇「Hea碧」貝碧托夫囉！


保加利亞主場波飛滯銷


自從去年5月宣布退出國家隊，即使主帥馬圖斯勸到口水都乾，貝碧依然堅決唔再為保加利亞效命。佢貴為去季英超神射手之一，朗尼當然慶幸唔使硬碰呢位紅魔隊友：「7次當選保加利亞足球先生，貝碧托夫有幾堅唔使多講，今戰冇佢在陣，對英格蘭梗係好事啦！」




咁樣畀朗尼笠高帽，新季喺曼聯冇碇企嘅貝碧總算有番啲安慰，之不過保加利亞足總就肯定愁到爆！事關保加利亞喺G組得5分，出線機會凍過水，班Fans都冇興趣入場打氣，直至尋日，今戰只係賣咗15,000張波飛，據講就算足總出絕招喺油站推出優惠價門票，銷情都係麻麻，預期可容納43,600人嘅利夫斯基球場今晚會幾吉。