蘇格蘭主場克敵

猪拉多纳

03/09/2011
文： 樂比堅尼

經過昨晚連場大戰，今晚得番一場歐洲國家盃外圍賽Ｉ組賽事，蘇格蘭主場對捷克。捷克自尼維特、真高拿等「黃金一代」成員退役後，處於青黃不接時期，成績好似食咗瀉藥咁，但始終背負盛名，故經常可搵到筍盤，好似今晚「地頭蟲」蘇格蘭主場出擊開出平手盤，樂比仔誠意推介主隊。（now 633周六晚10時直播）




Ｉ組形勢好簡單，西班牙５戰５勝首名出線冇乜懸念，捷克９分排第２但比４分嘅蘇格蘭踢多一場，所以若蘇格蘭今仗全取３分嘅話，仲有機會爭次名，否則被捷克拉開至８分距離，都唔使點諗出線。




蘇格蘭近年同大賽冇乜緣分，但唔代表呢隊波實力差，喺樂比仔眼中，蘇格蘭主場依然有一定威力，其簡單嘅英式踢法，加上鮮明嘅鬥志，主場對任何球隊都有力一戰，正如去年十月外圍賽，蘇格蘭面對世界盃冠軍西班牙都係僅負一球，上月熱身賽亦贏過丹麥，過晒氣嘅捷克要喺蘇格蘭主場取得甜頭，又談何容易？


捷克實力今非昔比


雖然話蘇超球隊近年喺歐洲賽令人失望，但呢隊蘇格蘭只得五名球員來自蘇超，大部分球員都喺英超搵食，今仗賽前更有隊長費查復出，配合查理阿當、占士摩利臣嘅中場線，拍埋捷克一啲都唔輸蝕。




捷克方面，隊長施治因傷缺陣，大大影響咗防線嘅穩健性，畢竟三名門將加埋都係代表過國家隊４次，前線靠巴路士數胡亦欠缺殺傷力，攻不銳守不穩，睇怕都唔係蘇格蘭手腳。