蘇格蘭添食搶3分

猪拉多纳

03/09/2011
文： 走肖

歐國外今晚上演I組獨腳戲，蘇格蘭喺主場對捷克，平手撐得過。今場蘇格蘭有隊長費查復出，而且領隊奇治利雲09年上任後首次領軍，就喺熱身賽打沉捷克省靚招牌，撞啱對方有鋼門施治養傷，梗係食過翻尋味啦！（now633台及廣東體育周六晚10:00直播）




上季因為病到瘦晒，大部分時間休息嘅費查，自稱已經回復100%，而且佢最近喺預備組賽事對阿仙奴、史雲斯踢足全場，就連曼聯領隊費格遜都話，希望蘇格蘭安排佢上陣，等佢可以搵番比賽節奏，加上有卡迪夫城射手堅尼米拿、利物浦中場查理阿當同些路迪中場史葛布朗幫手，牌面唔曳o架。


領隊處子戰曾贏1:0


仲有呀，奇治利雲自爆，09年12月佢上任後等足3個月至有比賽，當時壓力大到曾經諗過唔撈，後來首次領軍以1:0打沉捷克，先至令佢重拾自信，所以好想添食咁話，依家蘇格蘭落後第2位嘅捷克5分，想出線今場肯定搏，格拉斯哥流浪後衞韋達卡停賽，些路迪翼鋒甘文斯同新特蘭門將哥頓因傷缺陣影響唔大。


捷克球員嚴重跌Watt


講到捷克，冇錯佢哋仲有大批外流球員出國搵食，但依家嘅加拉塔沙雷前鋒巴路士同阿仙奴中場路斯基，已經唔係以前分別効力利物浦同多蒙特嘅佢哋，表現下滑嘅幅度相當得人驚，最慘係車路士鋼門施治傷埋，冇佢把關，捷克未必有能力保住清白，平手盤都好容易出事。


歐國盃外圍賽賽制


分組賽採主客雙循環賽制，勝得3分、和得1分、負得0分，若同分將先計有關隊伍的對賽成績。每組首名及9組中最佳成績的次名將獲得出線權，餘下8組次名需進行兩回合附加賽決定另外4個出線席位。