智利當起贏面高

猪拉多纳

04/09/2011
文： 樂比堅尼

周一凌晨上演一場國際熱身賽，墨西哥同智利喺中立場西班牙嘅巴塞隆拿較量。智利經過多年低潮，近年踏入收成期，上仗熱身賽令世界盃冠軍西班牙陷於苦戰，足見其厲害，今仗對征戰頻繁嘅墨西哥有力贏波，樂比仔捧智利Ｗ！




（周一凌晨３時開賽）




智利九八年喺森莫蘭奴、沙拉斯等球星帶領下闖入世界盃決賽周，但之後就進入長達十年嘅青黃不接期，直至呢兩、三年開始復甦，除咗去年打入世界盃十六強，目前嘅世界排名更升至十一位，一班新星好似阿歷斯山齊士、伊斯拿、加利美度及維達爾逐漸成熟，有能力擔大旗。


墨國厭戰求勝欲減


智利日前同西班牙踢咗場熱身賽，結果喺領先二比○嘅優勢下，完場前畀西班牙反勝三比二，雖然輸波有啲唔抵，但球隊整體表現相當唔錯，相信班後生仔今仗會加多兩錢肉緊，希望唔好連輸兩場。




墨西哥方面，佢哋喺周六凌晨同波蘭踢咗場熱身賽，結果憑查維亞靴南迪斯嘅入球，與對手打成一比一，其實墨西哥近年喺國際賽嘅表現都唔錯，可惜佢哋暑假連踢美洲金盃及美洲國家盃兩個大賽，球員對勝利嘅飢渴感遠不及智利，加上智利要為下月開戰嘅世界盃外圍賽備戰，而墨西哥係中北美洲大佬，世盃出線冇乜難度，故智利一定比墨西哥更想贏波壯聲威。