小獅磨牙食大餐

猪拉多纳

05/09/2011
文： 樂比堅尼

香港時間周二凌晨熱身賽，「幼獅兵團」英格蘭U21主場迎戰以色列U21。今個夏天踢完U21歐國盃決賽周後，意味新一批嘅「小獅」準備接棒，新成軍嘅英格蘭U21喺首場外圍賽大勝而回，大大增強咗呢班後生仔嘅信心，今仗對實力平庸嘅以色列，有力取得大捷，樂比仔捧「讓球主勝」及大盤。




（now 671周二凌晨2時直播）




英格蘭國家隊多年來喺國際賽無甚建樹，但青年軍級別卻屬於頂級勁旅，原因好簡單，因為呢班後生仔喺英超球會培訓下，往往比同齡球員早熟，而且好多都有英超經驗，拍落其他球隊未見過大場面嘅細路，呢班英超少爺兵自然超晒班，但當佢哋踢落幾年，過慣奢華生活，好快就會畀其他國家嘅年輕球員迎頭趕上。


英軍新丁博上位


睇番英格蘭U21嘅大軍名單，人腳其實相當平均，「老將」有佐敦軒達臣、魯迪維爾及蘭斯貝利，亦有阿歷士張伯倫同域咸兩位僅過十八歲嘅新星，由於唔少新仔都係初踢U21，要爭取表現博上位，所以上仗對阿塞拜疆U21踢來相當落力，最終大勝六比○，相信有助提升士氣。




以色列U21實力可用比上不足、比下有餘嚟形容，由於佢哋係一三年U21歐國盃決賽周嘅主辦國，所以唔使踢外圍賽，不過以該國嘅青訓水平，同英格蘭仍然有一段距離，而該隊陣中亦只有兩名外流球員，兼且唔係一隊成員，故面對億萬大軍英格蘭U21，睇怕只能輸少當贏。