國腳因「公」受傷球會每場收3萬人仔補償

猪拉多纳

06/09/2011
文： 走肖

「愛拚就會贏」，好多人都明白呢個道理，為咗鼓勵球員為國足搏命，今年中國足協有好計，就係擬定最新國腳受傷補償方案，列明假如有男足球員喺國家隊集訓或比賽受傷，足協同保險公司會負責治療費用，缺席球會比賽嘅話每人每場有3萬人民幣補貼，上限係每人每年最多拎到100萬人仔。


杜絕國足Hea踢國際賽


2003年嘅舊補償方案，要求球員喺國家隊集訓或比賽受傷後，球會要當佢係有份上陣嘅球員發放獎金，直至完全康復為止，正因為咁，好多球會老闆會吩咐球員Hea踢國際賽，避免受傷之餘，又可為球會減輕負擔，由於唔敢得罪球會同教練，據講部分國腳根本唔敢100%投入為國家隊賣命。




今年足協同保險公司合作推出新方案，列明受傷男足球員每缺席1場球會賽事，補貼3萬人仔，每年上限100萬人民幣，至於女足球員，受傷嘅話每月得到1.5萬人仔補貼，以每年唔超過18萬人民幣為上限。




世盃亞洲區外圍賽賽制：今輪為第3圈，20支球隊分5組進行雙循環分組賽，每組首兩名晉級第4圈。




南美球會盃賽制：南美球會盃第2圈採主客兩回合制，今輪為次回合，若兩回合總比數打和，以作客入球較多一隊為勝，若作客入球數字相同，即互射12碼定勝負。