葛度爾古斯上盤靠得住

猪拉多纳

07/09/2011
文： 朱楓

聽朝南美球會盃第2圈次回合爆發「阿甲打吡」，葛度爾古斯返番主場對拉魯斯。葛度爾古斯為出線，上場聯賽刻意留力，今仗對近排惡戰連場嘅拉魯斯，值得睇高半線，朱楓捧上盤！（開賽時間：周四早上8:45）


拉魯斯地莊難頂


首回合葛度爾古斯作客拉魯斯，幾乎全場都領先，可惜最後臨天光瀨尿被逼和2:2。為咗出線，葛度爾古斯日前作客沙蘭迪兵工廠，教練佐治達施華特別收起射手魯賓拉美尼斯、中場奧美度、迪亞高維拿同後防禾保利4名主力休息，點知最後都贏2:1，預計今場夫添出擊下，可以輕鬆再下一城。




繼首回合主場幾經辛苦打和葛度爾古斯後，拉魯斯日前返阿甲又硬撼學生隊，雖然贏2:1，但地莊連續踢兩場大戰，都咪話唔辛苦，最慘前鋒李安度迪亞斯、中場華拿里同甘莫蘭尼斯都有傷，今場上陣成疑，作客有備而來嘅葛度爾古斯，想反客為主唔係咁易！