法林明高「客勝」咪錯過

猪拉多纳

08/09/2011
文： 亨格比利

朗拿甸奴今季鹹魚翻生，獲重召入巴西國家隊不特止，仲肩負率領法林明高爭標嘅重任。呢支里約熱內盧球隊近期戰績回落，主帥盧森保高為省靚招牌，聽朝帶隊造訪防線等人使嘅哥連泰斯唔衰得，一於敲1.75倍「讓客」。（開賽時間：周五早上8:50）




咪以為「細哨」返巴西搵食就會Hea住踢呃波糧，今季佢都不知幾Sharp醒，至今已經貢獻12個「士哥」同6次助攻。啱啱為「森巴兵團」披甲鬥加納嘅朗拿甸奴已經歸隊，加上智利中場發電機哥迪奧馬當拿度做完左膝手術後已經復操，兩大中場主將聽朝會齊齊擔正，前線嘅迪維迪肯定大把供應。


哥連泰斯防線唔夠腳


另外，據巴西傳媒講，近期法林明高球迷好唔妥主帥盧森保高，原因係佢老人家只注重踢悅目足球，一啲都唔重視防守，上仗法林明高大敗畀巴希亞1:3之後，唔少Fans都叫佢下台，盧森保高為挽面子點可以唔做番齣好戲吖！




開季係威係勢嘅哥連泰斯最近跌晒Watt，對上4場聯賽輸足3場，最大鑊係左、右閘拉蒙迪摩拿斯同阿歷辛度莫利都因傷缺陣，教練迪迪焗住要喺預備組搵人上A隊湊夠腳，防線咁殘要頂住堤亞高尼夫斯同「細哨」嘅進襲唔容易，聽朝仲學人讓波？唔使輸都偷笑咯！