利物浦難破史篤城

猪拉多纳

10/09/2011
文： 江忠德

每次國際賽之後，對強隊嘅影響實大過弱隊，假如仲要作客嘅話，想有運行都唔容易，好似利物浦今場對住喺主場踢到飛沙劈石嘅史篤城，千祈咪以為好易砌，事關一班球員好似古積特、查理阿當同達寧等剛踢完太公波，球員舟車勞頓應未趕得切回氣，今仗隨時陰溝裏翻船。（有線201、301及廣東體育周六晚10:00直播）


周日英超撐諾域治


史篤城要踢歐霸盃外圍賽，所以球員好早進入作戰狀態應付英超開咧，好似逼和車路士一役軍心大振，加上主場狹窄令到手榴彈戰術發揮到淋漓盡致，呢場先至係「紅軍」嘅真正考驗！




至於禮拜日嘅諾域治對西布朗，感覺上好似喺季初即刻要踢護級大戰，升班球隊諾域治依家成績仲好過西布朗一啲都唔意外，佢哋個別球員質素都幾高，例如哥夫斯同史提芬摩利臣，都有份代表威爾斯喺歐國盃外圍賽鬥英格蘭，只要佢哋可以將喺國家隊嗰種頑強抵抗，前仆後繼嘅奮鬥精神帶返去諾域治，相信要贏季初低沉兼冇乜入球板斧嘅西布朗，應冇難度。