國米華麗登場

猪拉多纳

11/09/2011
文： 巨高

今晚意甲尾場巴勒莫主場對國際米蘭，呢個戲碼以往都有得打，但今季就未必，因為「傻豹」巴勒莫接連出售陣中主力，包括柏斯托尼及洛斯連奴等。國米雖亦有伊度奧離隊，但留住史奈達，並掃入科蘭及莫路沙拉迪，整體戰力絕對在巴勒莫之上，巨高捧國米上盤。（now 633周一凌晨2時45分直播）




未講波前，巨高先講講國米班主莫拉堤。歐洲球員無論喺轉會費或者球員薪金都已出現失衡情況，好景時候當然冇人會出聲，尤其係既得利益者。但衰在依家歐美經濟都處於不明朗局面，肯攞幾廿億出嚟搞波嘅老闆愈來愈少。況且搞波呢門生意蝕多過賺，試問邊個會咁戇居倒錢落鹹水海？國米老闆莫拉堤以前就係咁戇居，自成為球隊班主之後就不停「泵水」買球星，但成本效益遠遜於預期，搞到佢同球迷都極為氣餒。


巴勒莫要錢唔要貨


為免情況惡化甚至惡性循環，盡量減少收購球員係方法之一，就以今季國米為例，今季只得一個新球員列卡度艾華利斯身價過千萬歐元，其餘新人都係幾百萬貨仔甚至係借用。相比起莫拉堤以往「大花筒」性格，佢已經唔再做大闊佬，成為一個精打細算嘅生意人。




相同情況亦出現於巴勒莫，老闆森柏連尼喺轉會窗瘋狂放售球員，比如沙列古及柏斯托尼等人，均以高價出售到巴黎聖日耳門。球隊實力是否大幅下降佢唔在乎，有錢落袋最實際。




縱然星味大減，但今場戰情一定唔會悶。事關國際米蘭新帥加斯柏連尼係擅攻之人，全攻型打法係佢最大賣點，料今場會同巴勒莫鬥攻，捧上盤之餘，補埋入球大。