托迪出面撐安歷基 羅馬士氣「大」振

猪拉多纳

11/09/2011
文： 郭球奇

今季大搞西班牙化嘅羅馬今晚終於喺意甲首度登場，老實講，球奇對佢哋幾期待，難得「王子」托迪賽前仲出言撐教練安歷基，士氣即刻返晒嚟，惜後防始終有隱憂，對住卡利亞里，球奇寧信往績，捧1.75倍入球大！（開賽時間：周日晚9:00）


羅馬 Vs 卡利亞里


羅馬今季大變身，唔止換老細，仲請到前西班牙名將安歷基執教，佢一上任就搵嚟荷西安祖、加高、奧斯華度同保贊等西甲兵加盟，擺明想學巴塞，可惜「雌狼」踢落麻麻，繼熱身賽慘敗畀華倫西亞0:3後，歐霸盃仲輸畀斯洛雲出局，安歷基仲傳同「王子」唔啱，搞到隊波士氣麻麻。


王子還擊卡利亞里挑釁


不過「王子」近日喺官網竟發表聲明，要求Fans支持安歷基，齊心為羅馬爭佳績，幫隊波打下一支強心針。其實托迪喺意甲影響力真係好大，今晚對手卡利亞里個會長施連奴就攞呢樣嘢挑釁托迪，話佢似藝人多過球員，好想請佢玩結他，羅馬中場迪羅斯立即話施連奴唔識死，預言托迪今晚一定會用入波還擊。




不過球奇始終對羅馬後防冇乜信心，事關祖安同施仙奴仲未好番，啱啱由禾夫斯堡加盟嘅卡積亞今晚會立即擔正，呢位丹麥中堅今季狀態奇曳，「狼堡」暫時喺德甲成績咁差多得佢唔少，隨時係羅馬後防一個計時炸彈。


近6次交手全開入球大


為爭取佳績，卡利亞里今季邀得上季教切塞納表現出色嘅費卡丹迪執教，賽前托迪都話忌佢3分。雖然卡利亞里今場有前鋒拉里維停賽，但新簽荷蘭射手艾卡比亞已可候命，火力有保證。事實上，卡利亞里近年對住羅馬場場都踢到好激，近6次交手更全部開大，今晚與其博羅馬大勝，倒不如玩入球大！


羅馬鬥卡利亞里旺開大


日期 戰果

2011/01/23 羅馬 3:0 卡利亞里

2010/09/12 卡利亞里 5:1 羅馬

2010/05/09 羅馬 2:1 卡利亞里

2010/01/06 卡利亞里 2:2 羅馬

2009/05/10 卡利亞里 2:2 羅馬

2008/12/14 羅馬 3:2 卡利亞里