富咸「大」得起布力般

猪拉多纳

11/09/2011
文： Sherry

好肉赤呀！好嬲呀！小妹上星期路不拾遺，點知轉過頭就跌咗部電話，勁慘，唔公平呀！哼，我要馬會幫補吓，要富咸入球大呀！（有線200、300及廣東體育周日晚11:00直播）


路不拾遺……跟手跌電話


成日聽人講「好心冇好報」，小妹終於深深體會到呢句說話囉！上星期我去「7仔」，見到有張八達通喺地下，小妹覺得即使值幾多錢都好，人唔見咗嘢一定會好唔開心，於是我拎番張八達通畀店員姐姐，等失主返轉頭認領。可惜，我對人好，人哋唔肯對我好囉！小妹之後坐的士返屋企，一落車想打電話嗰陣，先發現個「唉瘋」唔見咗喇，跟住當然係打番自己個No.，亦理所當然咁已經唔通啦……我諗，部電話依家應該喺先達賣緊囉……


好彩，小妹有唔少好朋友，佢哋除咗安慰我，有個Friend仲直情借埋部電話畀我用添，勁好人！哈，算啦，之前講嗰啲都係晦氣說話啫，好心有冇好報都冇所謂啦，做人做事，最緊要對得住良心對得住人嘛！


富咸近3次主場對賽大晒


小妹雖然好肉赤，不過都有做足功課，富咸今晚迎戰布力般流浪，1.95倍入球大好路。富咸開季3戰入得1粒，會方對症下藥，喺轉會窗關閉前揮低紐卡素，成功羅致前鋒拜仁雷斯，撞啱對家布力般3場失咗6球，雷斯仔有權科騷o架！話晒富咸近3次主場對賽都開大嘛，有條好路當然追得過啦！嘻，要馬會幫補個「唉瘋」都係講笑嘅啫，小賭怡情嘛，細細哋玩吓贏餐茶都好Happy啦！


微博傳情


唔開心，最好就係影多兩幅相減吓壓！小妹早兩日同幾位攝影界嘅朋友，去咗西九影吓相傾吓偈。望到香港個夜景咁靚，咩煩惱都冇晒嚕！哈！大家記住愛惜香港喇！


Sherry靚盤 富咸（入球大）


百足咁多爪嘅大學生，熱愛運動，最鍾意同啲Friend唱K兼睇波，曼聯中場路爾斯安達臣同車仔前鋒費托都係佢杯茶！