祖記火辣迎擊帕爾馬

猪拉多纳

11/09/2011


祖雲達斯以往畀球迷嘅感覺較為保守，但自從執掌球隊嘅阿尼利家族，派出三十五歲嘅安迪亞接替會長職務後，祖雲達斯隨即進行大改革，帶畀球迷無限新鮮感。除咗有新球場、新教練、新球員、新網頁之外，就連教母亦由當時得令嘅巴拉圭索模拿莉莎擔任。「斑馬兵團」以全新面目示人，呢份強而有力嘅新鮮感勢必令死氣沉沉，專執舊貨嘅帕爾馬倍感到壓力，料祖雲達斯可於新竇祖雲達斯球場（Juventus Stadium）首場正式比賽輕取對手，捧「讓球主勝」。（now 633周日晚6時30分直播）


8700萬歐元擴軍


祖雲達斯為營造出新鮮感，不惜耗資超過8700萬歐元去添置新人，貴價貨包括列治史迪拿（拉素）、維達爾（利華古遜）、胡仙歷（羅馬）。教練干迪話球隊今季人腳充足，幾乎每個位置都起碼有兩個球員可動用，對於排陣及戰術運用極有幫助。今年阿尼利家族向祖雲達斯投放大量資源，難怪今季球隊殺聲震天，講明要砌低米蘭雙雄，重登意甲王者寶座。


拿莉莎做教母殺晒


另外喺提升士氣方面，今季祖雲達斯由星級模特拿莉莎擔任教母。而以巴拉圭乳神今時今日嘅名氣，其他球隊教母真係要行埋一邊。其實祖雲達斯與拿莉莎能夠拉上關係，全因巴拉圭國家隊左翼艾斯迪加列比亞加盟。一向擅長把握時勢嘅拿莉莎，梗話自己係祖記球迷，乘機殺入意大利市場。

帕爾馬近年專執二攤，基奧雲高、柏拿甸奴及巴拉斯等球員，全部都係祖雲達斯棄將。佢哋有幾多料祖雲達斯早就知道晒，今次作客都幾難惡得出樣，唔捧「讓球主勝」等幾時。