估皇馬巴塞不如刨績玩英冠

猪拉多纳

12/09/2011


仁：麥馬拿仁　樂：樂比堅尼




仁：今季英超形勢真係簡單不過，曼徹斯特雙雄兩隊玩晒，踢咗四輪全勝，仲係場場大炒，呢啲咪係霸氣囉，睇怕今年冠軍都離唔開呢兩隊。




樂：拿仁，聯賽係長途戰，踢38輪o架，依家只係踢咗4場，唔好咁快下判斷住，當歐聯開番，各隊兩線作戰，傷兵潮湧現嘅時候，形勢可能又唔同，但無可否認，曼城今季嘅勢頭的確好勁，踢出來嘅根本就係阿仙奴全盛期嗰種水銀瀉地嘅攻勢。




仁：唔好提阿仙奴喇，我對呢隊波真係好失望，之前輸畀曼聯二比八，都可以話唔齊腳，對手咁弗冇得講，依家增咗兵，對住隊史雲斯都踢成咁，點爭入前四呀？睇怕歐聯席位都凍過水。


維拉史篤城樹大好遮陰


樂：今時唔同往日，我諗大家對阿仙奴暫時都唔好抱太大期望，既然曼聯同曼城咁順，咪一於繼續搭順風車囉，如果嫌太熱，我覺得維拉同史篤城都唔錯，正所謂樹大好遮陰，呢啲中型班冇人留意，但長期交出水準，值得跟進o架！




仁：其實今輪英超都算正路，反而西甲玩死人，皇馬同巴塞都輸盤喎，你有冇中招先？

樂：依家西甲啲盤真係人都癲，皇馬主場對基達菲要讓三球，巴塞作客讓蘇斯達兩球，係咪傻o架？早幾年西甲邊會出現呢啲盤，不過冇計o架喎，皇馬同巴塞真係超晒班，佢哋想贏嘅話，唔好話兩三球，五六球都得，你捧佢又覺得個盤唔抵玩，反佢又唔知幾時發威，所以呢啲波真係冇得賭o架！

強弱太懸殊等於任佢開

仁：係囉，其實啲波咁強弱懸殊，站在投X者角度，都唔知係好事定壞事，你精個莊都唔係傻，佢哋個盤本身都開得好辣，吓吓讓兩三球，你敢唔敢買先？小弟都係鍾意賭英冠多啲，直播都唔使睇，刨吓績就搞掂，賭波最緊要贏之嘛，使乜一定賭直播波。

樂：你講得啱，記得畀多啲好料小弟！