不明物體亂世橫飛

猪拉多纳

13/09/2011
文： 黃興桂

世上最曲折離奇、最精彩嘅足球賽事歐聯將於香港時間周三凌晨展開，今屆歐聯嘅特色之一，就係有啲大家唔太熟悉嘅球隊參與，好似今晚出場嘅亨克、尼科西亞，同埋聽晚嘅特拉布宗、加拉治等就欠缺知名度，不過睇波唔一定係睇名氣，名不見經傳嘅球隊一樣有好球員或好教練，佢哋隨時於今屆賽事冒起，成為明日之星。




其實歐聯三十二強分組賽，唔一定係優勝劣敗嘅，因為好多球隊要兼顧本土聯賽，歐聯分組賽對佢哋嚟講，目標只係晉級，根據經驗，攞到十至十二分幾乎已肯定出線，所以就算實力超班，都唔係場場贏硬，去到淘汰賽階段，轉會窗重開，先至係真正拗手瓜嘅時候。


賴低紅軍有遺憾


對好多球迷嚟講，今屆歐聯缺少咗「紅軍」利物浦有啲失色，不過利物浦近年表現確實唔係太突出，好似上周末聯賽對史篤城咁，中堅加歷查鹵莽犯錯，導致球隊輸波，證明佢高峰期已過，如果領隊杜格利殊唔棄用佢嘅話，相信會係利物浦重返歐聯賽場嘅最大障礙。


金句：中秋追月夜，一於睇歐聯！