施捷斯尼剝同胞棚牙

猪拉多纳

13/09/2011

施捷斯尼要向波蘭隊友報復！阿仙奴對曼聯大敗二比八後，門神施捷斯尼返到國家隊畀多蒙特三星奚落，今次幾位波蘭人於歐聯碰頭，施捷斯尼誓保持清白之身，希望剝對手棚牙！


施捷斯尼畀「紅魔鬼」蹂躪後，返到波蘭國家隊成為笑柄，多蒙特三星巴拉斯塞高斯基、比薛斯基同羅拔利雲度夫斯基都落井下石，施捷斯尼表示：「我諗佢哋其中兩個會落場，最大聲嗰個巴拉斯塞高斯基未必有得踢。」呢個小將話唔會被冷嘲影響心情，會集中精神協助球隊贏波。

梅迪薩卡通風報信

另外，阿仙奴於轉會市場結束前引入德國中堅梅迪薩卡，主帥雲格話今場靠晒佢提供情報：「佢熟悉德國足球同多蒙特個場，依家又會同班隊友溝通，今次將會擔大旗。」梅迪薩卡上場對史雲斯表現不過不失，「兵工廠」防線甩漏甚多，唔知呢個高佬可否協助球隊頂住對手呢？