川迪神箭狙擊富咸

猪拉多纳

15/09/2011
文： 笛子波童

歐霸盃K組賽事，英超富咸主場鬥荷甲川迪，富咸近四戰不勝，狀態、信心俱一般。川迪進攻火力夠，有望在主隊嘅不穩防線上取得甜頭，今仗受讓捧1.83倍嘅「讓球客勝」。（有線61及201台周五凌晨3時05分直播）




富咸今季在歐霸盃主場出擊戰績彪炳，由第一圈開始對上四場全勝兼不失波，但論實力及經驗，幾支對手喺歐洲賽場只屬二、三流球隊，富咸贏波完全係意料之內，當佢哋近期返回英超戰場，面對較強對手立即冇得也文也武。


盧克迪莊傳射皆精


川迪貴為上季荷甲亞軍，亦係歐洲賽常客，今季由歐聯降格轉戰歐霸盃，實力當然有番咁上下，富咸面臨真正考驗。




富咸自從上月中在歐霸盃附加賽擊敗迪尼普，已經連續四場未贏過，而且場場有失波，後防唔算好穩陣。川迪上周末雖然都被洛達打破聯賽不敗身，但整體演出唔曳，佢哋今季連盃賽在內10戰只有一場冇波入，就算早前將前鋒拜仁雷斯賣畀今場對手富咸，仲有另外兩名箭頭真高、盧克迪莊頻頻士哥，其中21歲嘅盧克迪莊表現大熟大勇，上季射入12個聯賽入球，被視為「新尹佩斯」，最難得盧克迪莊係川迪上季助攻次數最多球員，技術全面。川迪今場作客形勢唔輸蝕，受讓值得捧場。