史浩克2倍W抵玩

猪拉多纳

15/09/2011
文： 朱楓

繼歐聯後，歐霸盃分組賽今晚亦會正式展開，其中布加勒斯特星隊會喺J組主場迎戰史浩克04。本來星隊主場戰績唔錯，可惜今年因唔合乎資格，全部要移師中立場舉行，再加上有「恐德症」，對住史浩克歐戰射手王魯爾實在唔似有運行，朱楓推介2倍客W！（有線64及204周五凌晨3:05直播）


近12次對德國球隊僅1勝


布加勒斯特星隊近年經常出席歐洲賽，好似上年都有打歐霸盃，雖然喺分組賽已經出局，但由外圍賽開始，4場主場保持不敗，包括打和拿玻里同利物浦2支勁旅，喺今屆歐霸盃附加賽兩回合計亦以3:1淘汰索菲亞中央陸軍，表現絕對唔失禮。




不過朱楓覺得星隊今晚對史浩克好難再延續佳績，事關歐洲足協早前裁定星隊主場今季唔適宜舉行歐洲賽，勒令佢哋今屆所有主場賽事都要移師克盧日舉行，踢落當然冇咁放，何況新帥利維上任後，隊波依然冇起色，暫時喺本土聯賽只排第5，最慘仲有「恐德症」，過往12次對住德國球隊只得1勝4和7負，呢場對住史浩克破唔破到蛋都係疑問！


「士哥王」魯爾踢歐戰醒神


上屆歐聯4強分子史浩克，今季「降呢」打歐霸盃可謂超晒班，早前喺附加賽兩回合計就以6:3大勝赫爾辛基晉級。雖然呢支德國勁旅近排喺歐洲賽作客已3戰不勝，不過球隊日前喺德甲作客欠運輸畀禾夫斯堡後，唔多唔少增強今場反彈決心，當中食胡一定靠晒魯爾，事關呢位西班牙射手一向打歐洲賽特別醒，係歐戰史上「士哥王」（73球），以佢近2場都有波入嚟睇，今晚對住星隊絕對有力添食，就算門將費文有傷上陣成疑，客W亦唔怕捧！


歐霸盃分組賽賽制：


48隊分12組踢雙循環分組賽，每組首2名將聯同歐聯8支小組第3名進身32強淘汰賽。

有赢不输