史特加打吡戰復仇

猪拉多纳

16/09/2011
文： 蘇斯黑柴

德甲獨腳戲上演西南部巴符州打吡戰，目前聯賽排名14位嘅弗賴堡主場迎戰排第10嘅史特加，上季弗賴堡主客兩循環都雙殺對手，但目前雙方人腳、狀態同士氣各走極端，史特加瓣瓣都佔上風，今晚下定決心復仇，史特加作客讓平半，黑柴捧上盤。




（有線61台周六凌晨2時30分直播）




弗賴堡目前內部問題嚴重，一直單天保至尊嘅射手柏比斯施斯成個夏天都嗌走，但球隊企硬要收天價轉會費，搞到佢焗住留隊，心情唔好近期所見喺場上失去衝勁。隊長兼防線領袖畢斯查因傷缺陣對球隊更造成沉重打擊，加上轉會窗關閉前一日仲將優質年輕守將丹尼爾威廉斯賣咗畀賀芬咸，實力進一步削弱。


弗軍5戰失16球


弗賴堡今季五戰共失十六球，同包尾嘅漢堡一樣係「黃大仙」，上仗喺另一場南部打吡慘吞拜仁七蛋，雖然話對手超班，但睇見班人士氣低落唔願追波，若非拜仁有歐聯後顧之憂未去盡，佢哋隨時輸夠雙位數。




史特加開季前受傷兵問題困擾，但幾名新兵反而令防線演出大幅進步，新加盟嘅墨西哥國腳中堅法蘭斯高洛迪古斯，同丹麥國腳防守中場基斯特都交足貨，球隊今季五戰只失三球，前線亦有日本射手岡崎慎司大爆發，佢哋今季只輸兩場，分別僅負於利華古遜同哈化柏林，但兩仗都唔多夠運，整體演出絕不在對手之下，今晚挾大破漢諾威強勢而臨，誓要搵弗賴堡復仇，小讓平半絕對係筍盤。