收10球指令 岡崎奉旨搏命

猪拉多纳

16/09/2011


岡崎慎司喺世盃外為日本入波逼和烏茲別克後，日前又喺聯賽正選上陣先開紀錄，帶挈史特加喺主場以3:0大勝漢諾威，個人「2戰連發」（連續2場入波），到底點解岡崎慎司突然翻生呢？佢話多得日本國家隊教頭沙哲朗尼鼓勵，收到「10球指令」後要更加搏命入波喎！


仲爭8球達標


曾經被形容為日本「新王牌」嘅岡崎慎司，近期無論喺國家隊定球會，都唔係擔任正箭頭，邊鋒位置令佢入球數字大減，不過日本教頭沙哲朗尼認為，其實岡崎慎司可以更加大膽嘗試攻門，完成今季喺德甲攻入10球嘅任務。岡崎慎司咁話：「教頭希望我踢得更有侵略性，同埋攻門嘅時候要更有決心。」




現時岡崎慎司喺國際賽累積22個入球，超越前輩中山雅史，進佔日本國家隊歷來入波最多排行榜第8位，但翻查歐洲主流聯賽歷史，東瀛球員中只有中田英壽98/99年球季，高原直泰喺06/07年球季分別試過為佩魯賈、法蘭克蘭單季攻入10球、11球，依家岡崎慎司仲差8球至達標，梗係要搏命入波至得啦！