棟悉先機：鎗臣跑番七成夠殺

猪拉多纳

　　剛周中賽事，唔係冇熱門馬贏過，如「享耆成」和「南陽望族」，不過，整體賽果唔係易中，淨係睇吓落飛黨喺某啲場次係咁「轟」，就知唔慌係熱門收場啦！希望轉番沙田日賽，戰果唔會咁難估，而望落今期10場賽事陣勢，有機會係熱頭冷腳之局居多。

　　第五場四班1400米草地。「鎗臣」上季未好過，1場位置都跑唔到，差成咁，換嚟評分暴跌，由二班81分，減到就嚟落得五班，除非真係武功盡失，評分咁減法，點都應該幫到手！其實佢上季曾有幾場賽事跑得接近，上唔到名都只係輸三幾個身位，仲要係喺三班賽。照咁睇，可能係匹馬冇咗mood。希望經過1個暑假充電，此駒有番昔日七八成水準，亦應該夠殺。

　　第七場一班1400米草地。「人人興旺」真係準得交關，跑咗超過10場，上名次數佔大多數，殺到上一班依然有馬贏，鬥心之勁值得讚賞。雖然此程冇1600米咁好衝，由於有新鮮感關係，唔使擔心咁多。而人馬於上季曾合作，小晉演繹上如比上季有進步，應該有贏面。隔晚得兩倍W係過分熱情，如臨場有3倍，阿棟一定幫襯。

　　第九場三班1200米泥地。「天賜福星」泥地1200米上陣4場，交出2冠2季，場地狀況好與壞，一一無損發揮，性能好及鬥心強梗係主因。今仗排9檔，係有可能畀對手頂出外叠，不過因應佢跑法關係，留又得，放亦得，根本唔會畀形勢牽住嚟走，料是爭勝要角。　

點買法

　　「鎗臣」太耐冇表現，買W可能唔划算，睇過佢隔晚WP有飛但唔係冇肉食，一於整條1W3P，保險得嚟亦進取。而重心Q喺第九場，熱門「天賜福星」做膽，由於拖幾匹冷腳，買埋位置Q亦可。

資深評馬人　陳華棟