曼聯黑夜劏車

猪拉多纳

18/09/2011
文： 樂比堅尼

嫌電視節目冇嘢好睇？今輪電影又唔啱你口味？好彩，仲有足球！今晚係屬於大戰嘅一夜，由晚飯時間七點半蘇超榜首戰格拉斯哥流浪鬥些路迪開始，到深夜AC米蘭作客拿玻里，多場猛Show等你欣賞。而最矚目戰役，當數曼聯迎戰宿敵車路士。「紅魔鬼」近期勢如破竹，英超主場已寫下十七連勝嘅新紀錄，反觀車路士今季由保亞斯接手後，仲摸索緊球隊嘅最佳陣容，連自己隊波都未ready，又點夠曼聯砌？樂比仔推介主W及「讓球和」！




（有線200及300台周日晚11時直播）




曼聯季初可謂勒都勒唔住，聯賽四連勝射入十八球，直至上周中歐聯作客賓菲加，收起幾件主力先和一比一，但今仗精銳盡出，迪基亞、拿尼、路爾斯安達臣、艾舒利楊格及查維亞靴南迪斯等主將復任正選， 睇怕車仔都幾惡頂。


老爺車仲未撻得着


曼聯最大本錢就係年輕，正選陣容大部分係二十出頭嘅當打球星，佢哋對勝利充滿飢渴感，球隊亦好有活力，呢點正係車路士目前最缺乏嘅元素。樂比仔睇晒車仔今季咁多場比賽，發現隊波暮氣沉沉，個別球員好似食咗成擔豬油咁，或孭住千斤重嘅包袱，連「王子」費蘭度托利斯都忍唔住鬧班隊友上腳太多，速度太慢，可謂講出問題嘅癥結所在。


費托入球荒未解決


車路士另一隱憂係兩大射手杜奧巴及費蘭度托利斯一個受傷，一個陷入球荒，保亞斯好可能要倚靠安歷卡及史杜列治攻堅，而中場大腦林柏特失勢，核心地位受到桑馬達及魯爾梅利斯威脅，增加咗球隊之間嘅矛盾，車路士目前正處於過渡期，無論領隊保亞斯或球員，都需要時間慢慢適應，呢個時候撞正如日方中嘅曼聯，只能夠話唔好彩！