拜仁圍攻史浩克 賀列貝利做老竇

猪拉多纳

18/09/2011
文： 力奇

重拾勁旅本色一口氣打出7連勝嘅拜仁慕尼黑，今晚出訪史浩克，力奇睇好佢哋開出1.7倍客W幫新任老竇列貝利贈興！拜仁自從開咧戰輸波後，班人已經醒番晒，試問仲靠緊魯爾支撐嘅史浩克點會頂得住吖？




（有線61、64及204周日晚11:30直播）




拜仁7連勝除咗喺德甲蹂躪漢堡同弗賴堡之外，仲要係包括上周中歐聯作客擊敗實力分子維拉利爾。睇番佢哋喺德甲成績，未計尋晚一輪，拜仁暫時係以5戰4勝1負得12分排榜首，最得人驚係佢哋5場轟入驚人嘅16粒波，後防線喺今季買入鋼門紐亞、鐵衞謝路美保定同拿菲爾後，即時變得滴水不漏僅失1球。




人腳方面，拜仁賽前傳出射手馬里奧高美斯同中堅雲拜頓因傷上陣成疑，之但係力奇搵過料，馬里奧高美斯當日歐聯踢咗半場就收起，似乎係為安全計兼留力今仗多啲，隨時係煙幕唔定。


史浩克魯爾獨力難支


仲有一點，好波之人列貝利近排終於擺脫傷患，打番爭氣波，贏盡各界讚賞。呢位法國國腳前晚仲再做老竇，愛兒喺慕尼黑出世，一班老友今晚梗係要為佢做場好戲，何況紐亞都係首度倒戈史浩克，又點會想衰？




另邊廂嘅史浩克，門將費文整傷韌帶繼續紮住上，係後防隱憂。再睇埋佢哋近仗成績，上周聯賽不敵禾夫斯堡，上周中歐霸盃又話悶和布加勒斯特星隊，狀態唔算出色，前線亨特拉爾踢大賽信唔過，就算魯爾踢到曉飛，恐怕都幾難搞得掂拜仁。

有赢不输