棟悉先機：金玉之光開咗氣掂

猪拉多纳

　　快活谷B欄賽事，檔位因素當然緊要，但跑法一樣重要，留住衝，冇話實衰，不過唔易追係事實。講到騎師方面，今晚對於吳嘉晉及柏寶較為看好，二人坐騎數目唔少，加上胯下各有惡馬，仲唔只得一兩匹，好有可能，騎師王會落入佢哋是但1位嘅手中。

　　第二場四班1650米。「金玉之光」上仗發揮唔多啱心水，但又唔怪得晉仔，如果比賽時樣樣做得好，就唔會係10磅，佢經驗未足，唔應該太抽秤嘞！講番上場表現，蝕位之下，入到直路仲幾衝得，未開氣跑1600米可以咁貫注，睇嚟目前進度真係幾好。今次轉谷草，排2檔，賽事環境或比田草仲合適，如騎者發揮得好，由於對手唔多，唔難入三甲。

　　第三場一班1650米。計實力，「家樂飛」最強，但場地係冇咩根據，因為佢只跑過兩場谷草1200米，當時仲要未成氣候㖭。至於轉到呢程，氣量唔擔心，因田草1600米曾勝，何況，練者用番柏寶，人馬合作未甩過P，咁嘅配搭，梗係可信。希望6檔唔會令隻馬攞位唔靚，如留得好好哋，直路鬥衝一段，唔會驚任何對手。

　　第七場三班1650米。「漸信良駒」一個字已經可以形容──「準」！跑咁耐，唔喺前幾名返嚟次數少之又少，忠心耿耿性格值得讚。呢次賽前準備做得足，有晒大閘、拍跳，唔似嚟熱身，只要晉仔舞得掂，呢匹路程專家負磅咁輕，的確有贏面。

點買法

　　正如開場白所言，今晚晉仔啲馬唔錯，獨贏過關，一於捧佢場，「金玉之光」射「漸信良駒」，雖然係熱門，賠率唔算低，中1隻都保到本。而重心QT場合揀第三場．馬少少，希望熱門收場！

資深評馬人　陳華棟