車仔省招牌撐「主W」

猪拉多纳

21/09/2011
文： 朱楓

啱啱喺「紅藍大戰」輸波嘅車路士，今晚喺英聯盃第3圈主場迎戰富咸嘅「倫敦打吡」誓搏盡求反彈！事關領隊保亞斯被爆喺輸波後返咗12個鐘工搵球隊弱點，又傳1月會買愛華頓新星，試問一班二線兵點敢唔搏命？對住肯定有射手森莫亞缺陣嘅富咸，1.88倍「讓球主勝」要捧！（now638台周四凌晨2:45直播）




尋日《每日郵報》爆料，指車仔喺輸畀曼聯後，領隊保亞斯叫球隊技術部通宵剪番場波嘅精華，之後第二日朝早7點就返辦公室研究，睇到夜晚7點先收工，相信今場一定唔會再畀車仔出現失誤。事實上，保亞斯師傅莫連奴當年第一年教車路士，首個冠軍就係聯賽盃，保亞斯當然想複製師傅歷史。


富咸留力英超唔會搏


據《每日郵報》報道，車路士幾名正選賽前已獲通知今晚會被收起，相信當中包括上場空門射失被千夫所指嘅費蘭度托利斯，好在「藍戰士」後備兵源強大，賽前英國《每日鏡報》仲爆車路士打算喺明年1月以2,000萬鎊（約2.4億港元）斟愛華頓中場新星巴克里，一班二線兵聽到仲唔搏甩髀咩？




由於今季晨咁早就要出戰歐霸盃，富咸今季未打英超已經踢到殘晒，雖然上仗主場逼和曼城2:2，但喺英超仍然未嘗一勝排第18位，試問仲邊有精力再花喺聯賽盃？賽前富咸射手森莫亞透露由於之前足踝傷得好重，嚟緊會打一場抖一場，意味上場對曼城打足全場嘅佢今晚肯定缺陣，再加上領隊祖爾預告咗今場好大機會再收起安祖莊臣、艾朗曉士及艾度曉等主力，半力出擊輸兩粒隨時係最低消費。