洪禮賢講馬：軍事行動 二班老虎

猪拉多纳

　　第九場二班1400米。「軍事行動」外地一出即勝，在港首戰入P，休出能力可靠，所以，季前開操日子唔算早，工夫壓迫性又好似唔係好大，進度未必會比想像中落後，同埋，已有大閘作開氣在先，埋門亦有落草地跳過，以季初角度，算係有做嘢。

　　「軍事行動」係未贏過，但跑親二班場場喺前四名返嚟（負131磅或以上），當中曾經只輸馬頸跑第二，另有1場直路遲咗望空（亦略嫌拉士唔夠肉緊），都可以狂追現評107分「卡達聖」和110分「人人興旺」，伸算目前唔使負重，令勝望增高。

　　第十場三班1400米。「勁力」早課所見性情乖咗，埋尾單試都冇以前咁促咁搶，預期收斂後，能力仲會有得上，而喺上季已經認定佢三班超級，睇嚟潛質評級應可再調高。

　　上季四升三班首戰即遇阻力，沿路隻馬自己跑到錯晒，亦曾受意外影響，如果咁計，都仲本事入到前幾名，骨子裏演出更勝前三名。由於本身跑法留後又得，跟守中間又可以，今場排14檔，唔覺會令佢發揮綁手綁腳，除非早課睇得唔跑得，若不，屬尾場穩膽。

馬會賽馬節目主持　洪禮賢