AC國米捱細界

猪拉多纳

24/09/2011
文： Mic少

米蘭難兄難弟今晚意甲分途出擊，國際米蘭作客博洛尼亞、ＡＣ米蘭主場對切塞納。米蘭雙雄今次對手實力麻麻，但以兩大豪門近期頹勢，實在唔敢對佢哋抱太大期望，尤其係下周中需要出戰歐聯，更加唔會搏得太盡，即使贏亦好可能「煲魚生粥」，寧願兩場都揀入球細。


國米雲帥重整防線


頭場出擊嘅國米最大利好因素，係庸帥加斯柏連尼被炒，雲尼亞里首度領軍，佢首要工作係執好防線，事關國米近兩場作客共失七球，預料會摒棄上手三四三陣式，改為四四二，為後防止血。雲尼亞里屬於務實派，尤其依家風頭火勢，只求三分，不求花巧，一旦領先必定歎慢板，順便為下周中歐聯遠征莫斯科中央陸軍留力。博洛尼亞上仗逼和勁旅祖雲達斯一比一，今季三戰全細，穩陣計都係追入球細為妙。（now 633周日凌晨零時直播）


ＡＣ傷鋒冇埋柏圖


尾場ＡＣ米蘭嚴重「傷鋒」，繼伊巴謙莫域及羅賓奴後，柏圖上仗都受傷要抖一個月，雖然入替佢嘅艾沙拉維有波入，但呢位十八歲小將仍幼嫩，水準靠唔住。教練阿里基今仗或派卡斯辛奴同恩沙基合作攻堅，但前者近期搏到殘，後者已三十八歲，抖十個月後上仗復出只踢九分鐘，狀態不足，加上中場多屬工兵型球員，要破切塞納大門或比想像困難。而且ＡＣ下周中歐聯主場對柏辛域陀尼亞，阿里基手上兵源有限，需要慳住使，未必盡數，主Ｗ1.25倍唔抵玩，揀1.95倍入球細更划算。（周日凌晨2時45分開賽）