謝拉特歸位紅軍還魂

猪拉多纳

24/09/2011
文： 張志德

上輪聯賽慘被蹂躪嘅利物浦，今晚會返主場鬥狼隊，「紅軍」周中聯賽盃有謝拉特復出，細鬼估計利物浦可以輕取狼隊。（有線200及300台周六晚10時直播）




利物浦近期聯賽已連輸兩場，不敵史篤城之後，上輪更淨吞熱刺四蛋，非常丟架！幸好「紅軍」周中已經極速還魂，有隊長謝拉特復出之下，以二比一擊敗白禮頓成功晉級，謝拉特賽後更豪言要替利物浦捧走今屆聯賽盃，振奮球隊士氣。


主場搵狼隊復仇


其實利物浦今季大事增兵後，實力已有明顯改善，戰績之所以唔穩定，個人認為就係差咗謝拉特呢個領軍人物去串聯球隊。如今隊長歸位，「紅軍」肯定會爽番晒！再者，狼隊上季曾經作客晏菲路贏波，正所謂有仇不報非君子，利物浦今場肯定會踢得特別肉緊，好想贏波挽回上季主場一敗之辱。




雖然狼隊周中在聯賽盃大勝，但其實佢哋喺聯賽都係踢唔掂，近兩場輸晒合共失咗五球，狀態只屬一般，所以今場要作客晏菲路，細鬼唔相信佢哋可以搶到分，因此今場大可捧讓球主勝。




本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。