國米讓唔起博洛尼亞

猪拉多纳

24/09/2011
文： 走肖

加斯柏連尼開季冇耐就被炒魷，原因係佢嘅戰術得唔到球員信任，點知鏡頭一轉，國際米蘭老闆請咗個更令球員討厭嘅雲尼亞里返嚟，博洛尼亞今晚喺意甲主場對國際米蘭，絕對有條件趁對方軍心不穩開1.8倍「讓球主勝」，事關雲尼亞里曾經鬧國米球員係「暴徒」，邊個肯聽佢支笛？（now633台周日凌晨0:00直播）


曾鬧球員係「暴徒」


教開細球會嘅加斯柏連尼，唔識死將國米改成3後衞陣式，結果當然唔撈得長，至於執教過車路士、祖雲達斯同羅馬嘅雲尼亞里，江湖地位無疑高好多，但佢回歸意甲後，試過多次同國米開火，甚至鬧對方球員係「暴徒」，又話同藍黑兵團比賽要着盔甲至掂，最激連國米老細莫拉堤都鬧過，家陣點服眾呀？




除非國米球員集體失憶，否則冇可能唔記得雲尼亞里同佢哋大把牙齒印，而且中場史奈達、史坦高域同右閘馬爾干未傷愈，中堅蘭奴捷亞又停賽，開季5場正式比賽得1和4負要唔過。博洛尼亞方面，現時佢哋有唔少傷兵，近6次對賽又得1和5負，但始終日前逼和過祖雲達斯1:1，士氣肯定好過國米多多聲，鬥心搭夠博得過。