棟悉先機：自由港大把虛分

猪拉多纳

　　今日沙田10場賽事，韋達繼續停賽，柏寶又唔係咁多好馬在手，睇嚟好多場合都係爆冷居多，最終點爆法？阿棟唔知道，但要小心睇清楚部分場次嘅熱門，事關有啲馬隔晚係無端端有飛，係「風」吹關係，抑或係墊底飛，真係要動動腦筋。

　　第四場四班1200米。「皇仁勁駒」上季已兩W，算係超額完成，唔通今季仲繼續進步？呢點我有保留，不過，有時跑馬跑對手，細望呢場參賽馬，真係有啲唔開胃，有啲新到連出賽水準都未夠，又有啲唔係呢個路程嘅，蜀中無大將，唔揀有晒根據嘅佢，又有咩好揀。

　　第九場二班1400米。「軍事行動」實力在二班值頂級，只因上季未適應水土，仲係周身脾氣，搞到演出冇乜突破。不過，據馬房手足透露，隻馬經過咗暑期後，已經定咗好多，再唔似得以前咁躁，當然，消息係咁嚟，都要今日臨場望真啲，不過，假如進度屬實，以佢上季喺二班嘅表現，稍為進步啲，已經有好大贏面，成熱亦不宜挑剔。

　　第十場三班1400米。「自由港」上季跑過兩場，成績唔算理想，正確啲講，應該係話發揮唔係咁理想，但隻馬可閃閃身輸近，證明質底唔會差得去邊，六十幾分起步，虛分多的是。呢次同場多老虎，佢實博到賠率，再望望隔夜十幾倍W，正中下懷，相信會幕後會「起口」，如果今場發揮略比上季兩場稱職，已夠資格入三甲。

點買法

　　今期買W揀一熱一冷，第九及十場「軍事行動」與「自由港」，希望一對處女馬齊齊開齋！至於三重彩及四連環場次，揀埋尾場，１０、１２雙膽，拖埋邊線馬，好似１、２、３、８。

資深評馬人　陳華棟