洪禮賢講馬:大紅人博利好馬皇帝雙妙星 明旺白蹄烏勁快新強勁

猪拉多纳

　　今日兩泥八草，草地用B+2欄，向來跑得少，基數有限，但普遍唔似C欄，會有得追，而檔位唔拘。睇過隔夜騎師王飛數，冇1位熱得透，最熱有4倍半，就知今日形勢有幾平均，如果大圍計數，潘頓及蔡明紹大半坐騎有機會，值得多加留意。

重心場次 第9場 第二班（100-80分）1400米草地

　　「軍事行動」8月中先復課，總算做過晒大閘、草地程序，可能備戰趕緊時間，進度並唔差，最鍾意係佢又比上季尾再收斂咗；去季負重仍經常喺二班跑得好，比較下，今仗負中磅，威力必更大。

　　「經典皇牌」可以擊敗110分「人人興旺」，路程稍短也不怕。「蓬萊仙子」評分盡盡哋，好在今季暑後進程冇上季同期咁唔完整，操得足，試埋大閘至跑，揀埋最佳出路，如放得順，會有三甲。

　　「多采多姿」熱身後加程合理，除非今場又好似上仗早段際遇咁差，如果唔係，直路會衝得更有睇頭。「皇龍戰駒」9檔，要睇早段點泊位，楔得好，或有P。「齊歡笑」及「喜勁飛」，前駒進展及操練比後駒討好。　

第1場 第五班（40-15分）1200米泥地

　　「大紅人」及「博利好」，一齊試泥閘，一Q返，後駒名次及姿態較好（兩駒拉士都有加大壓迫催騎），不過，前駒做得嘢，頂得住辣工夫係少見及難得，因有班底，以佢行頭先。「馬皇帝」四班泥地只輸個幾身位返嚟，落五班，至少有三甲。「雙妙星」馬老，縮落1200米反而仲好。「好精伶」和「駿馬飛騰」拖腳還可。

第2場 第五班（40-15分）1800米草地

　　「雪蹄靈驥」及「歡樂寶寶」，一對馬上場都有揀，表現亦符合預期，估計加程必更合。

　　「壽比南山」及「綠駿群英」，初出路程唔啱，但跑得比預期差好多，唯有寄望開氣後會判若兩駒。「呼風喚雨」和「恒運財星」，大閘試得好，加上1隻有班底、1隻有形勢，拖晒。「威陽」或因上場外叠錯晒，大敗勿太計較。

第3場 第三班（80-60分）1000米草地

　　「勁闖駒」及「御鋒」，快鬥快，路程又擅長，檔位形勢都冇問題，賠率過熱都冇法子。

　　「滙名燈」剛仗視為冷馬，最終演出及格，但匆出跑此程則未必比谷草好。「奪寶」耐冇出賽（3月中流鼻血），跑唔跑得番靠估，但挨近上季尾已可重新投入操練，今賽前又做得夠，博佢有級數，縮程有得爆。「尊皇騰龍」與「黃金年代」皆對進度有保留，限作配腳。

第4場 第四班（60-40分）1200米草地

　　「皇仁勁駒」評分可能漸到頂，尚幸仍承接到去季尾餘勢，當然，7檔及128磅可能略有影響，未必贏得，卻夠資格爭P。

　　「夢幻魔術」去到8/9第2次大閘，貫注力係比前強，究竟有冇高估？應不出一兩場便知。

　　「長勝」睇準備手法，呢舖唔似冇郁手心態。「勝利旋峰」補出，但賽前明顯好實際咁做嘢。「同感」及「雙辣」，外檔如影響不大，同樣具上名機會。

第5場 第四班（60-40分）1650米泥地

　　「明旺」初出之前，開操日子幾遲，又係咁意跳3課就跑，輸得唔遠已覺叻，而如果唔係直路頭窒過，或湧得更好；2010年尾曾試大閘，沿路在後食沙唔怕，施騎亦有反應，轉場或有生機。「白蹄烏」和「新強勁」，內檔與跑法，應該易掌握形勢。

　　「勁快」唔知點解上場會曾經慢車（對面直路中段），不過，當草地能力差便算，熱身後回主項，應該有唔同。

第6場 第四班（60-40分）1400米草地

　　「勁加勁」前景會比「飛躍之旅」好，但上季後駒贏馬一役太誇張，今次齊齊落場跑，實力未必有太大分野。

　　「雙龍出海」重番係好事，因上季愈跑愈跌磅，而3季初出未曾跌出前列，休出有保證。「中國神農」煞科日有揀，明顯轉配件有成效，跨季追多場。「搖滾雄豐」可能縮回短途比1400米好。

　　
第7場 第三班（85-60分）1600米草地

　　「幸運勁」季尾呈回起勢頭，再多1個暑期調教，又落番三班，料可重拾優勢。「傳奇快車」3季初出例上名，往績要重視。

　　「永勝多」要跑得好啱，先可在此程入圍。「太平星」唞埋唞埋跑此程，末段仲好爆。「家傳碧玉」唔鍾意剛仗末段演繹手法，希望唔使等「清洗」，加程會即現形。「寶利多」分數回得算快，而工夫亦似樣，大冷在此。

第8場 第三班（80-60分）1200米草地

　　「紅運福星」去季第2仗已入Q，級數唔係同場對手可比，以此馬房而言，工夫做得已足，初出已經會搏。「堅旺財」上賽跑得比預期唔好，有藉口原諒，再追。

　　「帝豪駿駒」加罩有幫助，不過，再跑落去，可能中程先啱。「超群名駒」由短跑起，路程係唔合適，惟本身略有卡士，借助新鮮感，有機會克服到。「正黃旗」唔使辣操，賽前有足夠運動量就可以，又係休出關係，可能路短都湧到上嚟。

　　
第10場 第三班（80-60分）1400米草地

　　「勁力」及「勁贏晒」，一對年青馬，前程理想，上二班係最低要求，希望外檔影響不大。

　　「至勇飛龍」操練安排似上季一出即勝之前，有冷味。「精奇」早前大閘表現吸引，已具備狀態。「自由港」、「太陽海岸」亦有唔錯前景，跑得好，一啲都唔意外。「正毅」唞夠，仲降埋班，最有可能搗蛋，因話晒上季初還在二班同程入Q。