黑貓追捕金絲雀 九條命作客未衰過

猪拉多纳

26/09/2011
文： 樂比堅尼

香港時間周二凌晨英超獨腳戲，「金絲雀」諾域治主場迎戰「黑貓」新特蘭，諾域治上仗雖然打開勝利之門，但大軍攻力仍相當疲弱，有九條命嘅「黑貓」今季作客三場不敗唔死得，今仗受讓平半捧下盤，「金絲雀」插翼難飛！




（有線200及300台周二凌晨3時直播）




三支升班馬之中，諾域治可以話最欠缺性格同特色嘅一隊，防線唔穩，前線又冇乜入球板斧，相信來季降落英冠嘅機會相當大，雖然諾域治上仗作客擊敗保頓，取得今季首場勝仗，但保頓今季嘅表現係點，都唔需要樂比仔多講，如果今場係平手盤嘅話，都可能考慮吓諾域治，要讓波就冇得傾，一定撐新特蘭。


諾域治前後都唔掂


睇番諾域治今季五個入球，分別係來自五名球員，前線嘅荷拉漢同史提芬摩利臣都非射手材料，荷拉漢入球率一向偏低，最佳位置係進攻中場，而史提芬摩利臣踢法粗枝大葉，一直只効力低組別球會，加上後防三大中堅韋伯特、丹尼爾艾耶拉及艾利洛禾特養傷，曼聯借將迪拿特又係計時炸彈，前後都唔掂，諾域治都唔知搵乜去贏人。


新特蘭勝在夠硬淨


新特蘭近年都係英超中游分子，比上不足比下有餘，佢哋勝在有自知之明，主場全力搶分，作客則大打穩陣波，所以能夠喺英超企得住腳。「黑貓」今季踢咗三場作客全部不敗，而且僅失過一球波，可見佢哋嘅防守相當堅固，今仗作客贏唔贏到好難講，但要輸就唔容易，受讓平半一於支持下盤，穩陣派嘅球迷可揀「讓球客勝」。