紅魔舊部情繫金絲雀

猪拉多纳

26/09/2011


今晚場英超獨腳戲睇落戲碼平平，不過對兩位「紅魔鬼」舊臣嚟講就意義重大。新特蘭領隊布魯士貴為諾域治殿堂級猛人，今鋪重返卡羅路呢處成名地肯定百感交集。至於曾經被曼聯當垃圾踢走嘅安東尼派京頓，就希望靠「金絲雀」振翅高飛。




布魯士27年前喺諾域治打出名堂，之後就平步青雲喺曼聯踏上職業生涯高峰，今晚帶隊倒戈相向，呢位諾域治名人堂球星可謂百般滋味在心頭。布魯士話：「我喺諾域治成名，一對仔女又喺呢度出世，『金絲雀』喺心目中永遠佔據重要地位。」雖然對舊會有情意結，但布魯士講到明落場冇情講，今戰誓以全取3分為目標。


布魯士派京頓捱出頭


同樣係「紅魔鬼」舊臣嘅23歲翼鋒安東尼派京頓，昔日曾經被曼聯同布力般青年軍棄用，輾轉間淪落到踢業餘聯賽搵食，但佢一直冇放棄，近年先後幫史托港同哈特斯菲爾德奪得升班資格，今季終於捱出頭登陸英超。派京頓話有今時今日嘅成就，全靠當初喺低組別聯賽打好根基，未來目標？當然係代表英格蘭國家隊出戰！