華倫迎馬達拆車做好戲

猪拉多纳

28/09/2011
文： 阿占

今晚歐聯E組重頭戲，啱啱西甲被破不敗之身嘅華倫西亞，主場迎戰喺英超贏波兼有桑馬達倒戈嘅車路士。雖然兩隊一輸一贏波，但「阿占」始終認為華倫上場輸波，純為留力今晚打爭氣波。今場全力出擊，要頂住車路士絕非無可能，受讓平半唔使諗咁多，撐硬華倫下盤！（有線61及201、中央5台周四凌晨2:45直播）




華倫雖然喺轉會市場臨完結前連桑馬達都賣走埋，但表現總算保持到，起碼早兩輪就連「地上最強」巴塞隆拿都贏佢唔到！原本以為佢頭4輪西甲錄得3勝1和係一路奇兵，點知上周末作客西維爾竟然輸0:1！小弟初頭都好愕然，但諗深一層佢哋都係留力歐聯啫！只要出線16強，就有多舊錢落袋，國內聯賽唔係唔緊要，但都係現實啲好！何況桑馬達離隊38日之後回歸，今場都唔想衰畀佢睇。


華倫聯賽留力搏今鋪


教練艾美利上場對西維爾將射手蘇爾杜達擺落後備席，其餘有份落場嘅就踢得顧顧忌忌，結果上半場失波後就追唔番。夠膽放棄聯賽3分，艾美利其實有晒部署，今場高效射手蘇爾杜達踢番正選同車仔搏命，受讓抵博到極。


車仔內訌讓唔起


本來車仔上仗大勝一場係好消息，但對手只係新升班嘅史雲斯，就算小弟係「車迷」都有啲保留。加上就算班球員幾弗都好，領隊保亞斯都無情講，林柏特等老臣子輪流做後備，仲有「王子」費托之前又批評隊中老將，依家成「車」怨氣，球員領隊間有心病仲要作客打硬仗？睇波無所謂，但要真金白銀撐佢哋，小弟就覺得窄窄哋喇，咪搞！