熱刺歐霸獻細

猪拉多纳

29/09/2011
文： Mic少

歐洲足協將以前嘅足協盃包裝成歐霸盃，希望提升呢項賽事地位，可惜喺歐聯面前，歐霸盃始終係「二奶」，唔受主流聯賽球會重視，名牌球隊登場，實在不宜高估，今晚分組賽第二輪上演，A組英超熱刺擺明車馬以副選應戰，加上將於周日惡鬥阿仙奴，主場對沙姆洛克流浪更加有留力理由，建議捧2.65倍入球細。




（有線61及201台周五凌晨3時05分直播）




雖然熱刺唔係Big4，但畢竟係上季歐聯分子，今季降格踢歐霸，即時放軟手腳，上輪分組賽作客PAOK，領隊夏利列納派大量副選上陣，有幾位仲係「90後」小將，結果悶和○比○，若非對手射失十二碼，熱刺隨時輸波都唔奇。


聯賽對阿仙奴仲緊要


由於分組賽剛開始，即使失分，之後仲有機會追，相信熱刺現階段唔會太搏命，特別係球隊將於嚟緊周日英超同死敵阿仙奴合演倫敦打吡，領隊夏利列納更加有大條道理留力。事實上，熱刺今季目標爭取打入前四，再奪來屆歐聯入場券，對盃賽抱可有可無態度，早前就喺英聯盃出局。值得留意，熱刺近三場盃賽都互交白卷，反映球隊無心爭盃。




沙姆洛克流浪係愛爾蘭班霸，曾十六次問鼎聯賽冠軍，屬各隊之冠，亦係上季愛超盟主，而且愛爾蘭同英國歷史上關係密切，深受英式足球影響，熟悉熱刺踢法，可以作針對部署，佢哋自知實力唔及對手，應會主守博攞一分。