海灣者淋熄火燄

猪拉多纳

04/10/2011
文： 樂比堅尼

明早上演美職聯賽盃決賽，矢志連奪三屆冠軍嘅西雅圖海灣者將於主場迎戰芝加哥火燄。海灣者堪稱盃賽專家，對上兩屆都係美聯盃得主，今屆又再打入決賽，即使火燄團火幾咁厲害，睇怕都會被海水撲熄，樂比仔捧主Ｗ！（周三早上10時開賽）




樂比仔早年去過美國採訪美職，明白咗一個道理，雖然洛杉磯銀河同紐約紅牛名氣甚響，但講到球迷聲勢，冇一隊拍得住狂熱嘅海灣者。海灣者與呢項盃賽甚為有緣，加入美職首季已奪冠軍，上屆衞冕成功後，今屆又叫胡，想喺佢哋手上搶走冠軍可謂困難重重。




決賽旺2:1波膽




其實海灣者唔算特別好波，但成功因素主要有二，首先係德籍教練舒密特經驗極為豐富，曾先後帶領銀河及機員勇奪總冠軍；其次就係先前所講嘅狂熱球迷，上屆海灣者又係喺主場踢決賽，結果打破呢項賽事入座率，照目前賣飛走勢，今屆好大機會再創紀錄，唔使講大部分球迷都係捧海灣者㗎啦！




芝加哥火燄近期愈戰愈勇，近八仗正式賽事取得六勝一和一負佳績，其中射手奧杜奴同馬高柏巴腳風超順。不過自海灣者加入美職以來，火燄從未贏過對手，近兩次作客西雅圖都係輸一比二，而咁啱海灣者近兩屆美聯盃決賽都係贏二比一，揀主Ｗ之餘，一於捧埋呢個波膽！