櫻花紅鑽鬥玩守「細」

猪拉多纳

05/10/2011
文： 走肖

日聯盃8強大戰今晚連環爆發，受到世盃外同傷停問題影響，幾乎每隊都嚴重唔齊腳。大阪櫻花今晚喺主場對浦和紅鑽，兩隊同樣「主力不在」，分別有最煞食嘅王牌新星清武弘嗣同原口元氣缺陣，對撼唔似多波入，趁住天氣轉涼一於冷敲2.15倍入球細。（開賽時間：周三晚6:00）




近期櫻花好似食錯瀉藥咁狂失波，加上佢哋火力唔簡單，結果近18場有16場開入球大，而且連續3場主場開「主其他」波膽，咪話唔得人驚。不過唔好忘記，其實櫻花球季中段有射手洛迪高賓柏奧同前鋒乾貴士先後離隊，中場路爾斯馬天尼斯同金甫炅最近又排隊受傷，兵源有限唔似可以場場搏盡喪攻。


超新星清武弘嗣倦勤


再講原本有份入選日本國家隊嘅超新星清武弘嗣傷埋，加上後衞金聖基同門將金鎮鉉又被南韓國家隊徵召，家陣櫻花攻又唔夠人，守又唔穩陣，唔通仲會盲目搶攻咁唔識死咩？未必啩。對家紅鑽情況唔好得幾多，前鋒田中達也長期養傷，射手艾美臣又走埋，搞到堂堂07年亞冠盃冠軍排尾四，淪落到護級邊緣。


紅鑽大阪紮營有備而來


更慘嘅係，紅鑽今場有攻入8個聯賽入球嘅翼鋒原口元氣入選日本國家隊，中場大腦馬斯奧李察迪斯停賽，剩低幾多火力大家心中有數。紅鑽日前喺聯賽對大阪飛腳後，一直冇返埼玉縣，留喺大阪繼續備戰，應該會諗計作出針對性部署，抵擋櫻花炮火，入球細值得冷敲。