棟悉先機:旅遊小子愈跑愈弗

猪拉多纳

　　嚟到10月竟然1個風球接1個，天氣真係反常，突然間想講，有時真係要愛惜地球資源，唔好以為阿棟一把年紀，環保呢家嘢，我有出一分力，咪理多與少都好，總之有做最緊要。講番賽事，呢期C+3欄，如果唔落雨仲好啲，一個唔好彩個地慢啲，到時實會兵荒馬亂，喺呢啲時候，唯一方法─戒急用忍！

　　第三場四班1200米。「閃耀小子」上季同程能勝「日月暉華」、「超晒班」、「田園名駒」，上述蹄下敗將全在去季識贏，卡士喺四班點會唔高晒。而今季復出首仗跑第二，表現唔算好特別，事關末段佢冇能力進一步迫近頭馬「威威加瑪」，不過，阿棟有啲保留，因為當晚臨場所見，隻馬狀態未算弗。如果冇睇錯，經1場熱身後，可能會叻好多，有望補中。

　　第五場四班1650米。「旅遊小子」連跑兩場，成績仗比仗好，7歲馬性格使然，真係唔跑唔進入作戰水準，而睇佢上場爭同程表現，沿途蝕到冇得再蝕，一直望空喺最外叠上上落落，但佢直路仍衝得似模似樣，的確唔簡單。今仗排7檔，斷估前中段際遇唔會差得過上場，如果晉仔做好本份，要爭入一席位置，應該唔會好難。

　　第七場三班1200米。「佳同」谷草1200米曾贏「威威多星」，實力在三班必值中上級，復出即在強項出戰，鬥志唔會有疑問，不過，我擔心係近況問題，因為，開操日子略遲了，進度能否即趕上？好在有拍跳、大閘工序，咁都冇咁驚，冷冷哋，博吓WP。

陳華棟