洪禮賢講馬：軍花薄荷糖奄尖大少信賴

猪拉多纳

　　谷草C+3欄，少不免內檔馬秤先，不過，今季至此，谷草賽事模式成日變，跑跑吓亦可以忽然轉向，所以，臨場先可睇得真啲。馬房方面，睇落都係方嘉柏最有「景」，不過，問心嗰句，佢有啲場合嘅馬真係熱得過分，又或是唔易贏，真係要小心揀選。

重心場次：第5場　第四班（60-40分）1650米

　　「軍花」部署一如上季，以此程作首戰，賽前總算做妥準備，論態已起。由於2檔夾守好位跑法，今場早段又唔慌慢，佢應該可以好輕鬆咬緊有利位置，直路鬥檻，唔難入前列。

　　「薄荷糖」剛賽慢步速所累，但拉士爆得勁，賽績唔簡單，不過，轉場效果如何，真係兩睇。「旅遊小子」連續兩季都喺第3仗上名，而上場蝕到嘔亦差啲有P，假使今仗7檔唔跑得差過上場，已可入圍。

　　「奄尖大少」可衝贏「雪山神駒」、「心路」一對之後贏晒嘅馬，剛賽入Q水準堅得。「重量級」及「龍船快」排中檔及跑法關係，擔心蝕唔起。「信賴」一而再輸在賽事際遇，是次3檔及用1個手力夠嘅騎師，預算發揮大不同。

第1場　第五班（40-10分）1000米

　　「西域雄心」做咗好多嘢，備戰日子又充分，有晒水準先出嚟跑，如果唔係負重能力差，五班幾難搵到對手。「嘉嘉掂」弱馬唞唞埋埋，係頭一兩仗較可靠。

　　「馬中神駒」外檔風險難料，路程專家也只宜作腳。「千笑」排4檔，應唔會似上場被頂出最外叠，如夠快切入，或可帶到。「瀟洒靚龍」上場輸近得來不易，因早段用咗好多力至可切入，仍幾乎捱到尾有P，今仗2檔亦有機會賺跑法。

第2場　第五班（40-10分）1800米

　　「康樂名駒」一哩轉此程，性能更啱，而上賽打破多季以來初出例冇P數據，或顯示今季進度早到，至於換人亦係好事。「綠駿群英」跑1場即變身，始終係班內長途一線馬，再追。

　　「神箭金剛」唔排除似前駒，又係一經開氣後，成隻唔同晒。「朗天」和「恭喜發財」，有近似缺點（跑姿硬掘掘及論盡），不過，皆在剛賽追得好，如果計當時直路取位和走勢，前駒較吸引。

第3場　第四班（60-40分）1200米

　　「閃耀小子」熱到唔夠兩倍W，賠率係過熱，當然，如跑出上季打低「日月暉華」、「超晒班」時水準，應贏。「龍船旺」季前只快跳兩課及1大閘便出嚟跑，備戰態度與上季初唔同，所以，跑成點唔使理，當是谷閘算嘞，總之，賽後有操番，呢次排檔好，咪低估。

　　「金獅駿將」9檔要睇早段擺到喺咩位，太開，佢蝕唔起。「開心駕到」轉配件，如肯搶前，或有唔同發揮。

第4場　第四班（60-40分）1200米

　　「團隊精神」咪太介意剛仗三班跟好位拉士追落唔多，因今場落四班，形勢唔同晒，有埋好位更佳。「定做」初出差到唔信，只因「外遊」關係，轉場兼1檔，係咪乖咗仍能力普通，今場搵到最後答案。

　　「清脆利落」和「精英勇士」，前駒大外檔，後駒唔知呼吸系統幾時有事，只宜拖腳。「聚豪精英」又係少有會初出已跑得好，而轉此程其實一樣掂。

第6場　第三班（80-60分）1200米

　　「閃耀之星」初出直路跑得曳（騎師責任），仍可湧入第五名，鬥心好、自覺性強，亦可能虛分多，邊樣都好，肯加程及換人，追佢，寧早莫遲。「聚有盈」試到第2個大閘才稍好，不過仍嫌未銳，睇吓路程經驗幫幾多。

　　「馬風雲」縮落此程博懵，上季初都用過呢招（得第四），而今次儲夠新鮮感，以及賽前有晒準備，效果或比上季更好。「田園名駒」班次壓力大，限爭三至五名。「戰士」與「悅璐孖寶」，前駒耐冇跑，但休出好；後駒減分多有卡士，冷門可考慮。

第7場　第三班（80-60分）1200米

　　「紅旗勇將」發揮正常，三班咩馬都唔怕，如轉歲後略有進步，重磅可能影響微。「綠色寶」上場貼過，已指出1場比1場走規好轉，今場終用柏寶，搏梗，係擔心步速利唔利追。

　　「友瑩果」7檔而本身夠快，好大機會掌控晒形勢。「享耆成」賽事環境或與上場唔同。「明達」好唔鐘意剛仗演繹手法，轉騎師兼1檔，未必係副車。

第8場　第三班（80-60分）1650米

　　「創佳績」及「飛快無敵」剛在此程分獲冠季，演出俱佳，由於今仗好位、對手唔多，仍具威脅。「漸信良駒」分數漸緊，係靠1檔及路程性能。

　　「成就美麗」和「華倫天奴」，初出表現平平，名次又唔起眼，但各有各原諒之處，呢對大冷門建議拖一注。「邦先生」12檔，未必有番上賽早段局面，位置居多。