烏拉圭噓爆玻利維亞

猪拉多纳

07/10/2011
文： 亨格比利

2014世盃南美洲區外圍賽今晚開戰，打頭陣由烏拉圭主場對玻利維亞。世界排名第4嘅烏拉圭，論人腳高玻利維亞幾班，足總賽前仲宣布波飛大減價，望吸引更多球迷入場，1.45倍「讓球主勝」走唔甩！（開賽時間：周六凌晨3:00）

玻利維亞備戰嚴重不足

上屆世盃攞第4，今夏又喺美洲盃稱王，烏拉圭以行動證明畀世人睇佢哋唔係符碌，加上早排喺歐聯整傷右腳足踝嘅卡雲尼已經復操，今晚可以夥拍科蘭同蘇亞雷斯合組三箭頭，前線威力可說大增。唔知係咪對手太曳，烏拉圭足總擔心銷情唔好，將今仗門票調低至最平20美元（約155港元）1張，預期世紀球場超過6萬個座位必爆滿。對家玻利維亞出發前往蒙特維的亞之前，只係曾經喺拉巴斯進行過1次齊人嘅操練，備戰嚴重不足點同烏拉圭鍊呀？


況且玻利維亞對上8次喺世盃外圍賽造訪烏拉圭錄得1和7負，主帥昆達路斯自去年11月上任後領軍11戰未贏過，今鋪隨時輸鑊勁都似！