米爾頓凱恩斯上盤好路

猪拉多纳

10/10/2011
文： 亨格比利

球壇教頭年輕化係大勢所趨，睇吓哥迪奧拿同保亞斯幾成功就知。英甲嘅米爾頓凱恩斯近兩季戰績起飛，原因係「英格蘭保亞斯」卡爾羅賓遜堅係有料，呢位全英最嫩口教頭剛啱請完森林食檸檬，誓要緊守崗位率領米爾頓重返英冠，今晚獨腳戲造訪近況唔掂嘅奧咸，小讓平半當然要上盤。（開賽時間：周二凌晨2:45）




咪睇羅賓遜個Look成熟穩重，查實佢只係得31歲，屋企幅牆仲掛住科拿嘅簽名相同杜格利殊海報，真係同小Fans冇分別。出身自愛華頓青年軍、同謝菲斯、奧士文、希拔做過隊友嘅羅賓遜自嘲屎波，開口埋口都用「失敗」嚟形容自己嘅球員生涯，不過講到領軍功力，呢位少帥就贏盡口碑。


奧咸中後場主力打柴


前身係溫布頓嘅米爾頓，上季改由羅賓遜接手即刻殺入升班附加賽，雖然最後功虧一簣，但呢班波踏入新球季嘅表現比上季更Sharp醒，開咧11戰只係輸過1場咁大把，就連森林都想撬佢過檔揸旗，不過有情有義嘅羅賓遜就堅決唔走，目標係帶領球隊升班，陣營士氣梗係好啦！




佢哋上場聯賽大炒諾士郡3蛋，借將摩利臣一傳一射成為贏波英雄，佢好希望會方能夠將佢買斷，今晚肯定繼續搏盡證身價。對家奧咸聯賽兩連敗，前線仲要靠34歲嘅過氣芬蘭國腳古基擔大旗，難怪開咧11戰只係入得12球。況且奧咸今季英甲主場5戰有4場失分，守將麥禾圖、保羅布力克同隊長富文3大中後場主將又打埋柴，睇怕都好難頂得住米爾頓嘅進襲。

常在河边走