後薩達姆時代伊軍「發發聲」

猪拉多纳

11/10/2011


伊拉克以前喺薩達姆統治時期，國家隊表現差，球員可能會被酷刑處罰，隨住薩達姆倒台，伊拉克球員不但免再受皮肉之苦，而且多咗機會出外搵食，開始富起來，唔少國腳係百萬富翁，隊長尤尼斯嘅年薪更高達250萬美元（約1,900萬港元），呢班新進富貴兵團近日喺香港及深圳「血拼」，掃入電子產品同名牌服裝。




今次伊拉克大軍名單，有唔少球員効力卡塔爾及沙特阿拉伯等西亞球會，當中以効力卡塔爾球會最富貴，効力當地勁旅艾華卡拉嘅前鋒尤尼斯年薪達到250萬美元，仲提供豪宅及名車畀佢用，効力另一支卡塔爾球隊里科威亞嘅中場阿克林年薪亦有100萬美元，屬於高消費一族。伊拉克今次入住深圳一間五星級酒店，並帶埋私家廚師負責球員飲食，媲美世界一線強隊。


港深「血拼」狂掃名牌


佢哋到達深圳之前，已經率先喺香港瘋狂購物，主力掃電子產品同名牌服裝，去到深圳一樣買到冇停手，大讚當地係好地方。另外，伊拉克上仗世界盃外圍賽擊敗新加坡，每人獲得一萬美元獎金，今仗對實力更強嘅中國，相信贏波獎金更豐厚。