丹葡生死鬥

猪拉多纳

11/10/2011
文： 朱楓

今晚歐國盃外圍賽H組爆發榜首大戰，由丹麥主場硬撼葡萄牙。呢場賽事關係到邊隊直接進身下年決賽周，雙方戰意絕對唔使懷疑，不過鬧後衞荒嘅葡萄牙，上仗對住冰島後防都錯漏百出，呢場對住焗攻嘅丹麥，與其估邊隊贏，朱楓覺得買2.33倍入球大最穩陣！（now631台及有線155周三凌晨2:15直播）




目前H組形勢緊湊，葡萄牙、丹麥同挪威都仲有出線機會，當中葡萄牙同丹麥一樣得16分，但葡萄牙因首循環主場曾贏丹麥3:1，今晚交手只要保持不敗就可以首名出線，相反丹麥就一定要贏波先可以直接取得明年歐國盃決賽周資格，至於挪威就只得數字上有出線機會。


葡萄牙後防鬧兵荒


雖然形勢上葡萄牙首名出線比較佔上風，可惜佢哋鬧緊後衞荒，中堅比比同法比奧干查奧都因傷落選，卡維奴亦停賽，結果日前主場對冰島被迫改用副選防線，左閘更加要搵左翼艾利素客串。即使呢位馬拉加球員最後射入1球兼交出2個助攻，但亦累到隊波失咗3球，最後只係贏5:3，防線曳成咁，試問就算前線有C朗同拿尼兩大弗爆翼鋒孭飛，你都唔敢捧葡萄牙啦？


丹麥一定要贏喪攻


畢竟葡萄牙今仗對手丹麥，日前作客塞浦路斯，開波22分鐘已經贏緊4粒，最後大勝4:1完場，多少反映佢哋真係好有決心爭首名出線，但同葡萄牙一樣，丹麥今場亦有中堅丹尼爾艾格缺陣，要繼續用新星比治蘭特頂替。呢位23歲中堅上場對塞浦路斯無疑表現出色，但對手實力始終一般，今場對住以火力見稱嘅葡萄牙，隨時失準都唔奇。既然兩隊睇落都係攻強守弱，呢場捧入球大絕對係正路之選。




賽果熱線：2707 9900‧周二晚6時20分起至周三晚6時止