蘇格蘭爭入附加賽抵博

猪拉多纳

11/10/2011
文： 安高

歐國盃外圍賽I組仲有一個附加賽席位懸而未決，蘇格蘭同捷克2隊只能活1隊，其中蘇格蘭作客挑戰世界盃冠軍西班牙，表面睇牌面輸蝕，但實則冷味十足。鬥牛兵團領隊迪保斯基話明會出副選應戰，最多只係搵個腳風唔順嘅費托做箭頭，呢個「風流一哥」對住鬥志高昂嘅蘇格蘭隨時出事，安高今鋪決定冷敲5.2倍「讓球客勝」，博蘇軍唔輸。（now632台周三凌晨2:45直播）


迪保斯基講明派副選


如果齋講實力，西班牙肯定遠勝自98年世界盃後就同國際性大賽決賽周無緣嘅蘇格蘭，不過鬥牛兵團家陣喺I組已經累積7戰全勝提早出線，主帥迪保斯基日前就講明，會畀班主力抖抖，沙維、韋拿、桑馬達等都多數做後備，沙治奧拉莫斯同沙比阿朗素等又話因傷唔踢得，預計落場就係柏度洛迪古斯、佐迪艾巴同辛迪卡索拉等。


蘇格蘭英冠箭頭腳風順


安高唔係懷疑班西班牙二線國腳實力，只係始終佢哋合作唔多，默契唔慌好，最慘係前日就連皇馬守將艾比奧爾都話撞傷塊面唔踢得，稍為有經驗嘅都冇埋，今仗有閃失其實又有乜出奇先？




蘇格蘭呢邊，今仗只要戰果唔好差得過對住立陶宛嘅捷克，就可以躋身附加賽，鬥志點會差？冇錯，佢哋陣內傷兵唔少，正選前鋒堅尼米拿鼠蹊傷未好番晒，但上仗冇咗佢，都仲有個馬卡爾史密夫頂上，對住列支敦士登一箭定江山。




呢位白禮頓前鋒今季喺英冠入咗5球，腳風肯定好過西班牙嘅費托，賽前消息話佢背傷唔嚴重，可以繼續踢正選，加上曼聯中場費查都開始搵番狀態，做好第一道防線，再加埋利物浦嘅查理阿當愈踢愈有信心，話唔定真係可以創造奇迹，喺西班牙身上搶到分。