客串期福陞高照 巫斯義全力奪寶

猪拉多纳

　　法國好手巫斯義提早來港客串，即有頭馬進帳，當晚以「邦先生」食尾胡，證明佢早啲嚟係有意義，唔係亂咁「早到」！而上賽雖然未能延續勝勢，騎9駒無一能勝，不過，當日亦有數駒闖入前幾名， 像「履皇朝」、「風度翩翩」、「超級精神」、「帝豪駿駒」等等，反映巫帥支持度不小，而今仗他有5匹坐騎，話唔定又可連場入圍。

　　如果睇番佢之前上名嘅馬，大多集中在東廐，當然，呢個現象唔會成日發生，只因蔡仔停賽先會係咁，所以，巫斯義為要打好今次客串期基礎，有馬喺手一定搏得就搏。

　　呢期東廐有「夢幻十一」及「福陞」畀佢騎，前駒係新貨，未知底蘊，但後駒就唔同，今季已經跑過1場，熱完身即轉到長途，部署按部就班，表面上，剛賽跑嚟冇段好睇，隻馬唔啱路程此其一，此外，人馬唔夾亦係問題，因為直路隻馬不斷斜跑，鞍上人根本舞唔掂。呢次轉場用到巫斯義，發揮信得過，而仲有樣嘢值得留意，此馬隔夜忽然成大熱門，票數咁勁，空穴來風必有因是也！

　　此外，巫斯義頭場有匹「天下寶」，上場初出衝得唔錯，重磅可能有影響，但練者唔起用見習騎師，寧願轉用另一大師傅，睇嚟有心拼個明白。坦白講，呢匹馬分利係人都知，如果今場都唔得，先至分手。

Jack