飛腳主勝信心「滋」選

猪拉多纳

12/10/2011
文： 走肖

天皇盃第2圈今晚有好戲上演，大阪飛腳喺主場對佐川急便滋賀，讓球主客和「-2」都要照捧1.93倍「讓球主勝」。對上兩圈賽事，飛腳喺天皇盃同樣大勝對手，撞啱佢哋喺日聯盃4強出局，跌咗個桔當然唔可以冇埋個橙，創會20周年慶典點可以冇盃捧？梗係要贏番場省招牌啦！（開賽時間：周三晚6:00）




飛腳因為有前鋒李根鎬同中場遠藤保仁為國家隊服役，中場明神智和同右閘加地亮受傷，搞到喺日聯盃4強以1:2不敵浦和紅鑽出局。但唔好忘記，08年、09年天皇盃冠軍都係由飛腳奪得，上屆佢哋亦入到4強，之前飛腳話要奪取「3冠」慶祝20周年會慶，唔通依家會放過地位比日聯盃更高嘅天皇盃咩？


滋賀對乙組仔都大敗


再講，對上兩屆賽事，飛腳喺第2圈先後以6:2砌低大阪體育學校、5:2掃低流通經濟大學，證明唔會見到對手級數低而「腳下留情」，更何況現時飛腳依然大把攻擊球員用，除咗上仗打正選嘅巴西外援拉芬夏同文路爾阿方素，仲有東瀛組合平井將生同武井擇也，點排陣都殺得起。




對家佐川急便滋賀係07年、09年JFL冠軍，前鋒御給匠同中場中村元又話分別係07年、09年JFL最有價值球員，當中御給匠更巴閉到係07年、10年JFL神射手，但講到底，佢哋前屆喺第2圈以1:3不敵草津溫泉，上屆以2:4慘負水戶蜀葵，連日乙球隊都打唔過，對住日職榜首球隊聽捱打。