周六凌晨３「乙」鼎立法乙荷乙今受注

猪拉多纳

13/10/2011


法乙、荷乙今日開始有得受注，呢兩項次級聯賽通常喺香港時間周六凌晨開波，實行同德乙「三乙鼎立」，喺周六日主要聯賽開打前，率先畀球迷熱一熱身。法乙不乏曾經叱咤一時嘅老牌球隊，南特、摩納哥及蘭斯屬於前法甲盟主，加上耳熟能詳嘅朗斯、梅斯及巴斯蒂亞，相信球迷對佢哋絕不陌生。至於荷乙勝在入波多，今季開大比率高達七成，投X者值得留意。


法乙多過氣勁旅


法乙共有二十隊，首三名可升上法甲，尾三隊降班，今季已踢咗十輪，現時由曾於49年至62年期間六奪法甲冠軍嘅蘭斯排榜首，佢哋主場威力強大，五戰五勝，屬於唯一主場全勝球隊。以上季丙組冠軍升班嘅巴斯蒂亞，繼續有驚喜，位居第三位，陣中擁有前法國國腳洛頓，為球隊增添星味。




至於剛由法甲降班嘅摩納哥演出令人失望，敬陪末席，球隊主力四散後，最具星味係教練馬高施蒙尼，呢位四十二歲嘅前意大利國腳首執教鞭，明顯未夠功力。值得一提，法乙同法甲一樣，入波偏少，今季細盤比率佔61%，過去三季亦徘徊於六成左右。




荷乙共有十八隊，冠軍可直接升上荷甲，包尾球隊直接降班，前列球隊可參加升班附加賽。荷乙球隊名氣較遜，較為人熟悉只係兩支前荷甲球隊威廉二世及鹿特丹斯巴達。不過荷乙以多入球取勝，八輪聯賽已出現二百四十個入球，平均每場入超過三球，所以開大比率達七成，其中阿梅爾城八戰全開大。攻力最強係榜首施禾利，八戰入二十三球。